सोस्वा अर्थात स्टापी संस्था कर्मचारी आंदोलन पहिला दिवस 18-02-2017

SOSVA Training and Pramotion Institute http://stapi.org नावाच्या येरवडा पुणे येथील नामांकित NGO मधील कर्मचाऱ्यांच्या आत्मक्लेश आंदोलनाला आजपासून सुरुवात झाली...पुण्यात सगळीकडं प्रचाराची धामधूम असताना उच्चशिक्षित असणारे हे तरुण आपल्या न्याय्य मागण्यासाठी संस्थेच्या व्यवस्थापकांनी चर्चा करून तोडगा काढवा यासाठी आत्मक्लेश म्हणून संस्थेच्या दारात धरणं धरून बसले आहेत...!

काय आहेत मागण्या..?

कर्मचार्यांनी दिलेल्या पत्राचे अवलोकन केले असता त्यांचा खालील फक्त तीनच प्रमुख मागण्या आहेत असं समजतं...!

1.बेकायदेशीर निलंबित केलेल्या 4 सहकारी मित्राचं निलंबन मागे घ्यावे.
2.ठरलेल्या वेळेपेक्षा जास्त काम करून घेतले त्याचा अधिकचा मोबदला अर्थात ओव्हरटाईम मिळावा.
3.पुणे जिल्हा परिषदेच्या अंतर्गत जलस्वराज्य प्रकल्प 2 वर काम करणाऱ्या संस्थेतील कर्मचाऱ्यांना शासनाने ठरवलेल्या नियमानुसार वेतन दिले जावे सध्या 2 ते 3 हजार कमी दिले जात आहेत त्यासोबत ठरलेला प्रवास भत्ता आणि मोबाईल भत्ता दिला जात नाही तो नियमित मिळावा.

याचबरोबर बाकी इतरही प्रश्न आहेत यामध्ये..वेळच्या वेळी पगार मिळावा,ऑफिस टाईम ठरवावा,नियमानुसार पगारी सुट्या मिळाव्यात,सोडून गेलेल्या कर्मचाऱ्यांना अनुभव प्रमाणपत्रं दिली जावीत इत्यादी यासाठी संस्थेच्या अधिकारी आणि व्यवस्थापनांनी चर्चा करून प्रश्न सोडवावा यासाठी विनंती अर्ज दिलेला होता ऑफिस संपण्याची वेळ संध्याकाळी 5.30 पर्यंत कोणताही प्रतिसाद न दिल्यास आत्मक्लेश म्हणून संस्थेच्या दारात बसून राहायचा आणि आपली मागणी मान्य न होईपर्यंत घरीच न जाण्याचा निर्णय त्यांनी पत्रात सांगितला होता...!

व्यवस्थापणाचे पूर्णतः असहकार्य

संस्थेला याबाबत कर्मचाऱ्यांनी पूर्वसूचना दिलेली असताना देखील आजच्या संपूर्ण दिवसात चर्चा झाली नाही...संस्थने कोंडून ठेवलेल्या कर्मचारी वर्गास बाहेर काढण्यासाठी पोलिसांना बोलावून पोलीस चौकीत जावं लागलं आणि त्यानंतर चर्चा न करताच विश्वस्त आणि व्यवस्थापणाने पळ काढला...!

त्यांनी चर्चा करावी म्हणून मी संस्थेच्या CEO कानिटकर मॅडम यांना स्वतः फोनही लावला पण उलट मी धमकी दिल्याचे खोटंच सांगत पोलीस स्टेशनला मॅडमनी धाव लगेच  घेतली...परंतु पोलिसांना मी त्यांना केलेला आपला फोन रेकॉर्डिंग केला आहे आणि तो सोशल मीडियावर टाकलेला आहे असं सांगताच तिचा मॅडमचा चेहरा रडवेला झाला...संस्थेच्या मते 30 वर्षात अशी कधी तक्रार नाही त्यांचा एक विश्वस्त सांगत होत्या...आम्ही सर्व नियम पाळतो...उत्तम सामजिक काम करतो...संस्थचे विश्वस्त निवृत्त सरकारी अधिकारी आहेत...वकील आहेत आम्ही काय ते पाहून घेऊ आम्ही सरकारी माणसांना कसेही मॅनेज करू...!

मी स्वतः तसंच कर्मचारी आणि पोलिसांनी देखील चर्चा करून हा प्रश्न सोडावा अशी व्यवस्थापणास विनंती केली परंतु त्यांनी सकारात्मक प्रतिसाद दिलेला नाही...संस्थेकडे लेखी मागण्यांचे निवेदन दिलेले आहेच त्याचबरोबर पुण्याच्या कामगार आयुक्त कार्यालय...जिल्हा परिषद पुणे आणि याठिकाणी देखील याच्या प्रती दिलेल्या आहेत...पोलिसांनी आणि धर्मादाय आयुक्तांनी आमच्या अखत्यारीत कामगार विषय येत नाही त्यामुळे निवेदन स्वीकारले नाही...!

सहकारी मित्रांचे नेहमीप्रमाणे मार्गदर्शन

संपूर्ण दिवसभरात या प्रश्नाच्या बाबतीत आमचे मार्गदर्शक विद्रोही सांस्कृतिक चळवळीचे उपाध्यक्ष कॉ.विजय मांडके,पुण्यातील हमाल पंचायतीचे साथी नितीन पवार,पत्रकार मित्र हर्षल लोहकरे,समाजकार्य पदवीधर कल्याण मंडळाचे उपाध्यक्ष संदीप आखाडे,सहसचिव हरिभाऊ सणसयांच्याशी चर्चा करून मार्गदर्शन घेतले..तर आमचा सहकारी सागर धुमाळ स्वतः उपस्थित होता..!

पोलिसांचे सहकार्य

पुण्याच्या निवडणुकीच्या कामात व्यस्त असूनही येरवडा पोलीस स्टेशनचे उपनिरीक्षक श्री.अशोक कदम आणि गुन्हे प्रकटीकरण शाखेचे मा. लोहार साहेब यांनी प्रश्न समजून घेतला आणि लोकशाही मार्गाने चाललेल्या तुमच्या आंदोलनास आम्ही अडवू शकत नाही असं संस्थेच्या पदाधीकाऱ्यासमोरच सांगितले त्यामुळं खूप बरं वाटलं...!

चर्चेसाठी दिलेली मुदत संपली आणि आता...

आज दिवसभरात कोणतीही सकारात्मक चर्चा न झाल्यामुळं अजूनही सर्व कर्मचारी दारासमोर बसलेले आहेत...माहित नाही चर्चा कधी होईल पण कर्मचारी आपल्या मतावर ठाम आहेत याचा आनंद आहे...आता 5 महिला कर्मचाऱ्यासह 13 जण संस्थेच्या दारातच रात्र काढणार असल्याचं कळवलं आहे..संस्थेच्या निगरगट्ट प्रशासनाचा निषेध...लोकशाही मार्गाने सुरु झालेल्या आंदोलनास सोशल मीडियाच्या माध्यमातून तुम्ही सर्वांनी प्रसिद्धी दिलीत त्यामुळं याची सगळ्या सामजिक संस्थच्या वर्तुळात चर्चा होऊ लागली आहे याबद्दल तुम्हा सर्वांचे मनापासून आभार...!

संस्था आणि कर्मचारी यांच्यात लवकरात लवकर चर्चा होऊन सकारात्मक मार्ग लवकरात लवकर निघेल अशी आशा करूयात...यांच्यासारख्या इतरही कामगार हितविरोधी संस्थांना जाग येवो हीच इच्छा आहे...लडेंगे जितेंगे...!

शिवराम ठवरे-9175273528
मुक्त पत्रकार-18-02-2017
सेक्रेटरी- समाजकार्य पदवीधर कल्याण मंडळ,महाराष्ट्र

सोस्वा अर्थात स्टापी पुणे संस्था कर्मचारी मिटिंग 17-02-2017

अत्यंत महत्वाचे निवेदन...समाजकार्य पदवीधर कल्याण मंडळ महाराष्ट्र

आता उशिरा SOSVA Training and Pramotion Institute http://stapi.org नावाच्या पुण्यातील नामांकित NGO मधील काही कर्मचाऱ्यांसोबत बैठक घेतली...येथील प्रश्न खूप गंभीर आणि गुंतागुंतीचा आहे पण येथे काम करणाऱ्या बहुतांश सर्वांनी आता सामुदायिकपणे आपल्या स्वतःच्या प्रश्नांवर संस्थेच्या विरोधात उभं राहण्याची जिद्द ठेवली आहे...!

संस्थेमध्ये मागील काही महिन्यापासून होणाऱ्या शोषणाबाबत हे सगळे कर्मचारी संस्थेचे वरीष्ठ अधिकारी आणि विश्वस्त यांचेकडे पाठपुरावा करत आहेत...त्यांचे प्रश्न सुटावेत यासाठी सकारात्मक भावनेने विनंत्या करत आहेत परंतु त्याकडे वरीष्ठ अधिकारी व विश्वस्त दुर्लक्ष तर करत आहेतच परंतु होणाऱ्या अन्यायाला सामूहिक प्रतिकार करत असल्याचं लक्षात आल्यामुळे आता दडपशाही म्हणून संस्थेतील 4 सहकारी मित्रांना कोणतीही पूर्वकल्पना न देता कामावरून कमी केलेले आहे...!

कामावरून काढून टाकण्याचं कारण फक्त एवढेच कि त्यांनी अन्याय सहन कारण्यास नकार दिला आणि  त्याविरोधात बोलायला सुरुवात केली..याचा निषेध म्हणून संस्थेतील सर्व कर्मचारी उदया दिनांक 18 फेब्रुवारी 2017 रोजी सकाळी 10 वाजलेपासून संस्थेच्या आवारात संविधानिक मार्गाने याचा सामूहिक प्रतिकार करणार असल्याचं सांगितलं आहे...आणि आपल्याकडे त्यांनी मदत मागितली आहे...त्यांनी सांगितले प्रमाणे त्यांचे काही प्रश्न खालील प्रमाणे आहेत..!

नियमीत वेळेवर पगार केले जात नाहीत..!

कोणताही जादाचा मोबदला न देता सुमारे 14 ते 18 तास काम करवून घेतले जाते..त्यांचा कामाचे तास निश्चित नाहीत..!

आठवडी सुट्टी आणि राष्ट्रीय सण व उत्सवाच्या दिवाशीदेखील सुट्टी दिली जात नाही अगदी 26 जानेवारीलाही कामावर बोलवले जाते...!

पगारी रजा दिल्या जात नाहीत..!

कर्मचारी वर्गासोबत वरिष्ठ उद्धट बोलतात...गुलामाप्रमाणे वागणूक देतात..!

जलस्वराज्य सारख्या शासकीय प्रोजेकटवरती ठरवून दिलेल्या वेतनापेक्षा कमी वेतन दिले जाते...!

कोणतीही पूर्वसूचना न देता कोणत्याही कर्मचाऱ्यास कामावरून कधीही काढून टाकण्यात येते...!

संस्था सोडून गेलेल्या कर्मचाऱ्यांना अनुभव प्रमाणपत्र दिले जात नाही..त्यासाठी काही वेळा पैशांची मागणीदेखील केली जाते...!

तुम्हा सर्व सहकारी मित्रांना कळकळीची विनंती आहे...आपल्या सहकारी मित्रांनी सुरु केलेल्या या लढाईला आपण नैतिक सामजिक पाठींबा मिळावा यासाठी सहकार्य करूयात...त्यांची लढाई आपलीच आहे असं समजून काही मदत लागल्यास आम्ही सोबत आहोत याची खात्री देऊयात...याकरिता कृपया सर्वांनी या पोस्टला जास्तीत जास्त सोशलमीडियावरून प्रसिद्धी दयावी हीच विनंती...!

SOSVA Training and Pramotion Institute मधील सर्व कर्मचारी सहकारी मित्रांचे विशेष अभिनंदन आणि समाजकार्य पदवीधर कल्याण मंडळाचा यास सक्रिय पाठिंबा राहील ...त्यांनी अजूनही कोणती मदत मागितली तर नक्की सोबत उभे राहुयात...शक्य ते सर्व प्रयत्न करूयात...उदया संस्थेचे वरिष्ठ आणि व्यवस्थापक या कर्मचारी वर्गास सकारात्मक प्रतिसाद देतील आणि संघर्ष टाळून प्रश्न सोडवतील अशी आशा करूयात...!

लडेंगे जितेंगे...!

शिवराम ठवरे-9175273528
मुक्त पत्रकार-17-01-2017
सेक्रेटरी- समाजकार्य पदवीधर कल्याण मंडळ,महाराष्ट्र.
shivramthavare25@gmail.com

पॉर्न,कामजीवन आणि ग्रामीण महाराष्ट्र By प्रियदर्शनी हिंगे

पॉर्न,कामजीवन आणि ग्रामीण महाराष्ट्र By प्रियदर्शनी हिंगे

हा लेख माझा नाही लेखकाने स्वतः खूप विचारपूर्वक वास्तव सांगितले आहे म्हणून शेअर केला आहे

एका कार्यक्रमादरम्यान महिला पोलीस कक्षात काम करणाऱ्या महिलेशी, तसंच महिलांच्या प्रश्नांवर काम करणाऱ्या महिला वकिलांशी बोलणं झालं. त्या दरम्यान महिलांवर होणाऱ्या अनेक प्रकारच्या अत्याचारांची धक्कादायक माहिती मिळाली. त्या सांगत होत्या “दहापैकी नऊ केसेसमध्ये नवरा-बायकोच्या शारिरीक संबंधांमध्ये मारहाण झालेली असते. आणि ही मारहाण केवळ इंटरनेटवर फिरणारे पोर्न व्हिडिओ पाहण्यासाठी केली जाते.” ..!

जिथे पिण्याचे पाणी आणण्यासाठी सात किलोमीटर चालावे लागते, अशा एका खेड्यात नवऱ्याने पशुसारखा सेक्स केल्याने, त्या बाईला दवाखान्यात दाखल करावे लागले. या सगळ्या प्रकाराने तिला किती शारीरिक यातना झाल्या असतील, हे तिला घातलेल्या टाक्यांवरून समजते. दुर्गम भागात पोर्न व्हिडिओ पोहोचू शकत नाहीत, असा आपला भ्रम खोटा ठरवणाऱ्या आणखी काही अशाच प्रकारच्या घटना याच गावात उघडकीस आल्या. केवळ नवरा असं काही करतो, हे सांगायचं कसं आणि कुणाला, या संकोचामुळे या घटना समोर आल्या नाहीत. अशा अनेक घटना आजही अतिशय मागास समजल्या जाणाऱ्या भागातही घडताहेत....!

नांदेडमधल्या एका छोट्या खेड्यात एका अशिक्षित महिलेसोबत पतीने अनैसर्गिक सेक्स केल्यामुळे तिला अनेक महिने हॉस्पिटलमध्येच उपचारांसाठी राहावं लागलं. तिच्याकडे चौकशी केल्यावर समजले की पोर्न व्हिडीओत पाहूनच तिचा पती तिच्याशी अनैसर्गिक सेक्स करीत असे.त्यात दाखवतात म्हणजे त्यांना जमतं तर, आपल्यालाही जमेल, असा त्याचा समज. पत्नीनं अनेकदा शारिरीक त्रासाची तक्रार वारंवार करुनही केवळ आनंदप्राप्तीच्या हव्यासापायी त्यानं आपल्याच पत्नीला शारिरीक त्रासाच्या खाईत लोटलं...!

हे पोर्न व्हिडिओ पाहून आपणही अशा प्रकारे आनंद प्राप्ती करायला काय हरकत आहे, हा विचार डोकावतो; मात्र यासर्वांचे मूळ कशात आहे, हेच मुळी माहित नसल्याने अनेक प्रश्न अक्राळविक्राळ स्वरुप घेऊन समोर येतात....!

इंटरनेट माहितीचा खजिना असला, तरी या खजिन्यातून काय घ्यायचं हे ज्याचं त्यांनी ठरवायचं असतं. असं जरी असलं तरी इंटरनेट सर्वाधिक वापरलं जातं ते पोर्न व्हिडीओ पाहण्यासाठी पोर्न व्हिडीओ पाहण्याचा सर्वात स्वस्त आणि सोपा मार्ग आहे इंटरनेटचा. आधी हे लोण केवळ शहरापुरतं आहे, असा समज होता, मात्र हा समज प्रत्यक्षात गैरसमज ठरतो आहे. हे पोर्न व्हिडीओचं लोण गावागावात पसरतं आहे. केवळ पसरतच नाहीये तर त्याबरोबर अनेक गैरसमजुती आणि गुन्ह्यांना खतपाणी घालत आहे.नको त्या वयात चुकीची माहिती अशा प्रकारे मिळाल्यानं अनेक जण गुन्ह्यांचे बळी ठरत आहेत...!

©प्रियदर्शनी हिंगे.

जेष्ठ समाजिक कार्यकर्त्या डॉ.सुलभाताई ब्रह्मे यांचे निधन...!

महाराष्ट्रातील जेष्ठ स्त्रीवादी,निसर्गवादी मुक्त विचाराच्या क्रियाशील कार्यकर्त्या संशोधक आणि लेखिका सुधाताई ब्रह्मे यांचे आज सकाळी निधन झाले.. लोकविज्ञान संघटना,शंकर ब्रह्मे समाजविज्ञान ग्रंथालय आणि लोकायत याद्वारे त्यांनी सामाजिक कार्य आणि लिखाण केले आहे...!

जागतिकरण, मुक्त व्यापार धोरण,सेझ प्रकल्प,जैतापूर अणुऊर्जा यांच्या विरोधातील लोकचळवळीत त्यांचा पर्यावरण संवर्धन आणि मानवी जीवनाच्या शाश्वत विकासाची संकल्पना घेऊन सक्रिय सहभाग होता....!

अलीकडच्या काळात भाजपा सरकारने केलेल्या गोवंश हत्याबंदीचा निषेध करून गोवंश हत्याबंदीचा आर्थिक आणि सामाजिक दुष्परिणाम विषद करणारी त्यांची पुस्तिका संपूर्ण देशभरात चर्चेची ठरली होती...!

आयुष्याच्या अखेरपर्यंत त्यांनी भांडवली आणि ब्राह्माणी मानवताविरोधी मूल्यांची चिकीत्सा करून डाव्या पर्यायी विकासनीतीच्या अजेंड्यावर काम केले...तसे काम करणाऱ्या व्यक्ती संस्था संघटना आणि चळवळींना मनापासून मदत केली...!

आमचे मार्गदर्शक कॉ.धनाजी गुरव यांनी माझी आणि मयुरची विद्रोहीचे कार्यकर्ते म्हणून त्यांच्यासोबत त्यांचाच घरच्या भेटीत ओळख करून दिली होती... त्यांचा घरातील पुस्तके,त्यांचे लिखाण पाहून मयुर आणि मी दोघे हरकून गेलो होतो...पहिल्याच भेटीत त्यांनी त्यांच्या सर्व पुस्तकांचा संच आम्हा दोघांना भेट दिला होता...!

फोनवर अनेकवेळा बोललो तुम्ही माझी पुस्तके वाचलीत तर त्याचा अभिप्राय लिहून दया असं प्रत्येकवेळी त्या बोलत....त्यानंतर फक्त दोनवेळा त्यांच्याशी प्रत्यक्ष भेट झाली होती...एकदा सुनंदासोबत असताना दोघानाही प्रश्नांची सरबत्ती केली होती.. एकदम आठवणी जाग्या झाल्या...!

त्यांच्या निधनामुळे परिवर्तनवादी चळवळीची मोठी हानी झाली असून त्यांचे डाव्या पर्यायी सामाजिक आर्थिक आणि सांस्कृतिक विकासनीतीचे काम पुढे घेऊन जाणे हीच श्रद्धांजली असेल...विद्रोही सलाम...!

शिवराम ठवरे-01-12-2016
मुक्त पत्रकार-9175273528
विद्रोही सांस्कृतिक चळवळ,महाराष्ट्र
shivramthavare25@gmail.com

खुल्या प्रवर्गातील (विशेषतः मराठा) विद्यार्थी वर्गाची ईबीसीसाठी झाली ऑनलाइन फसवणूक...!

महाराष्ट्रातील खुल्या (विशेषतः मराठा) प्रवर्गातील समाजकार्य MSW आणि BSW,पत्रकारिता MBA,BCA,MCA यासारखे व्यावसायिक,इंजिनियरिंग मधील डिप्लोमा आणि डिग्री तसेच वैद्यकीय शिक्षण घेणारे 6 लाखाच्या पेक्षा कमी वार्षिक उत्पन्न असणारे सर्व आर्थिक मागास विद्यार्थी 50% फी माफीच्या EBC सवलती पासून वंचित राहण्याची भीती...ऑनलाईन फॉर्म भरण्याचा वेबसाईटवर वरील अभ्यासक्रमच नाहीत...!

यावर्षी शासनाच्या शिष्यवृत्तीची अमलबजावणी जलद आणि पारदर्शक होण्याकरिता विद्यार्थी संघटनांचा मागणीवरून महाराष्ट्राच्या उच्च व तंत्रशिक्षण विभागाच्या वतीने शैक्षणिक वर्ष 2016-17 पासून पदवी,पदव्युत्तर शिक्षणाचे EBC सवलतीचे अर्ज ऑनलाइन भरायचे कंपल्शन केलेलं आहे... त्याकरिता अर्ज भरायची अंतिम तारीख 25 नोव्हेंबर 2016 आहे http://ebc.dhemaharashtra.in या वेबसाईटवर प्रत्येक विद्यार्थ्यांने स्वतंत्र पणे अर्ज भरायचे आहेत आणि त्याची प्रिंट काढून महाविद्यालयात सादर करायचे आहेत..!

मागील अनेक वर्षांपासून विद्यार्थी प्रश्नावर काम करत असल्यामुळे शासनाच्या विविध योजनांमधून मिळणारी फी प्रतिपूर्ती,शिष्यवृत्ती याबाबत सखोल माहिती स्वतः आत्मसात करणे गरजेचे आहे याकरिता आजच जेव्हा ईबीसी सवलतीचे अर्ज यावर्षीपासून ऑनलाईन भरायचे आहेत असे आमचे मित्र विद्रोही सांस्कृतिक चळवळीचे कार्यकर्ते आणि कला व वाणिज्य महाविद्यालयाचे प्रा. युवराज जाधव-सातारा यांचेकडून समजले आणि आमचे मार्गदर्शक हेमेंत भोसले प्रा. जीवन बोराटे (समाजकार्य महाविद्यालय सातारा) यांचेशी फोनवरून चर्चा केली आणि स्वतः सदर वेबसाईटवर डमी लॉगीन आयडी तयार करून प्रक्रिया समजावून घेण्याचा प्रयत्न केला असता शासनाची फसवणूक लक्षात आली....!

या वेबसाईटवर आपली प्राथमिक माहिती सादर करून स्वतःचा लॉगिन आय. डी. बनवणे आवश्यक आहे....त्यानंतर आपल्याला आपल्या मोबाईल नंबरवरती स्वतःचा लॉगिन आय. डी आणि पासवर्ड मिळतो...त्यानुसार लॉगिन झाल्यावर 1.कॅण्डीडेट डिटेल्स,2.ऍडमिशन डिटेल्स,3.क्वालीफिकेशन डिटेल्स,4.आधार डिटेल्स आणि 5.डॉक्युमेंट अपलोड अशा पाच वेगवेळ्या पायरया  आहेत यामध्ये पहिली स्टेप पूर्णपणे झाली तरच पुढच्या स्टेपला जाता येत आहे...आता आपण कॅण्डीडेट डिटेल्स मध्ये स्वतःची माहिती भरून पुढच्या ऍडमिशन डिटेल्स या स्टेपवर जाताच...ऍडमिशन वर्ष आणि अभ्यासक्रम (Cource) याचे सिलेक्शन करावं लागते....!

सदर वेबसाईटवर केवळ B.A.,B.A.B.Ed,B,.Com,B.Ed,B.F.A(Dance),B.F.Ed,BSL-LLB-5 year,B.Sc,B.Ed,L.L.B-3 year,L. L.M,M.A.,M.Com,M.Ed,M.Sc,M.Sc (By Research) आणि M.S.C (Integrated) इतके मोजून 19 अभ्यासक्रमच आहेत...याव्यतिरिक्त इतर कोणताही अभ्यासक्रम उपलब्ध नाही त्यामुळे आपण फॉर्म भरतानाच्या दुसऱ्या पायरीवरच अडकून पडणार आहोत...आणि मुदतीत संपूर्ण अर्ज भरला नाही त्यामुळे आपण पात्र असूनही 50% फी सवलतीच्या ईबीसी सवलतीचा लाभ घेऊ शकणार नाही हे लक्षात घेतलेे पाहिजे....!

महाराष्ट्र शासन आणि उच्च व तंत्रशिक्षण विभागाने सदर वेबसाईट तयार करताना महाराष्ट्रातील सगळे  अभ्यासक्रमच समाविष्ट केले नाहीत त्यामुळे आता ईबीसी सवलतीचा पुरता बोजवारा उडण्याची शक्यता आहे...सर्व अभ्यासक्रम प्रोग्राममध्ये फीड केल्याशिवाय 25 नोव्हेबर 2016 या दिलेल्या मुदतीत अर्ज सादर करणे शक्यच होणार नाही...राहिलेल्या 7 दिवसांत सगळे अभ्यासक्रम ऍड करून महाविद्याल्यातच अर्ज भरून घेण्याची प्रक्रिया करायला हवी आहे...!

महाराष्ट्रातील खुल्या (विशेषतः मराठा) प्रवर्गातील समाजकार्य MSW आणि BSW,पत्रकारिता MBA,BCA,MCA यासारखे व्यावसायिक,इंजिनियरिंग मधील डिप्लोमा आणि डिग्री तसेच वैद्यकीय शिक्षण घेणारे 6 लाखाच्या पेक्षा कमी वार्षिक उत्पन्न असणारे सर्व आर्थिक मागास विद्यार्थ्यांनी आता जागरूक होऊन हा शिक्षणातील हक्काच्या ईबीसी सवलती पासून वंचित ठेवण्याचा शासनपुरस्कृत डाव हाणून पाडला पाहिजे...याकरीता आपण शक्य त्या मार्गाने विरोध नोंदवून आपआपले अभ्यासक्रम ऍड झालेच पाहिजेत अशी मागणी करणे अत्यावश्यक आहे...!

आपण काय करू शकतो...?
👉🏽हा मेसेज वाचल्याबरोबर स्वतः वेबसाईटवर जाऊन सत्यता पाहणे आणि ताबडतोब सोशल मीडियावर फॉरवर्ड करून जास्तीत जास्त प्रसिद्धी देणे...!
👉🏽सोशल मीडिया अधिकृत माध्यम नाही याची जाणीव ठेवून विहित मार्गाने आपले महाविद्यालय,तहसीलदार ,जिल्हाधीकारी,लोकप्रतिनीधी,शिक्षण संचालक,शिक्षणमंत्री आणि मुख्यमंत्री याना पत्र लिहू शकतो किंवा ई-मेल करू शकतो...!
👉🏽कोणत्याही पक्षाच्या विद्यार्थी संघटनेस याबाबत माहिती देऊ शकतो आणि दबाव निर्माण करण्याची विनंती करू शकतो...!

शासनाच्या चुकीमुळे निर्माण झालेली तांत्रिक अडचण दूर होऊन महाराष्ट्रातील खुल्या (विशेषतः मराठा) प्रवर्गातील समाजकार्य MSW आणि BSW,पत्रकारिता MBA,BCA,MCA यासारखे व्यावसायिक,इंजिनियरिंग मधील डिप्लोमा आणि डिग्री तसेच वैद्यकीय शिक्षण घेणारे 6 लाखाच्या पेक्षा कमी वार्षिक उत्पन्न असणाऱ्या सर्व आर्थिक मागास विद्यार्थ्यांना ईबीसी सवलत मिळालीच पाहिजे...!

शिवराम ठवरे-17-11-2016
मुक्त पत्रकार- 9175273528
विद्रोही सांस्कृतिक चळवळ,महाराष्ट्र
सेक्रेटरी-समाजकार्य पदवीधर कल्याण मंडळ,महाराष्ट्र.

आपल्या खात्रीसाठी मी बनवलेला डमी लॉगीन आय. डी. आणि पासवर्ड आपल्याला शेअर करत आहे कृपया पासवर्ड बदलु नका हीच नम्र विनंती...आपणास काही शंका असली किंवा माझ्या माहिती व्यतिरिक्त आपणास काही इतर अपडेट माहिती असेल तर अवश्य संपर्क करावा पण चुकीची माहिती पसरवायला नको...!

वेबसाईट:- http://ebc.dhemaharashtra.in
लॉगिन आय. डी आणि पासवर्ड
THAVARE SHIVRAM KONDIBA
Application ID:1011321
Password:Pass@123
Mobile:9175273528

लडेंगे...जितेंगे....!

500 आणि 1000 च्या नोटा बंद करून सरकारने डावे विचार आचरणात आणण्याचा केला जोरदार प्रयत्न...!

500 आणि 1000 च्या नोटा बंद करून सरकारने डावे विचार आचरणात आणण्याचा केला जोरदार प्रयत्न...!

शिवराम ठवरे-9175273528

कोणीही घाबरून जायचं कारण नाही...वेड्यासारख्या ATM बाहेर रात्रभर रांगा लाऊ नका... सोशलमीडियावर येणाऱ्या पोस्टवर जास्ती विसंबून राहू नका...अफवा पसरवू नका...शांतपणे विचार करून प्लॅनिंग करा...एकमेकांना सहकार्य करा...!

ज्यांच्याकडे रोख स्वरूपात बेहिशोबी मालमत्ता असेल त्यांनाच याचा त्रास होणार आहे...त्यामुळं कुणीही घाबरून जाऊ नये... केवळ बँकेचा अजिबात उपयोग न करणारे वा कमी उपयोग करणारे छोटे व्यापारी,दुकानदार,हॉटेल व्यावसायिक, मजूर,शेतकरी,कामगार,भिकारी,वेश्या या आणि अशा वर्किंग क्लासला थोडा त्रास होणार आहे...!

आपले नरेंद्रभाई मोदी खूप बोलतात त्यामुळं अजून फायनल नोटिफिकेशन किंवा कायदा काय येतोय याची वाट पहावी लागेल...बातम्या मध्ये येणार सगळं खरं नसतंय...!

सगळ्या निर्णयात डाव्या विचारांच्या आर्थिक अभ्यासकांच्या मतांचा प्रभाव दिसत आहे...म्हणून देशातील आर्थिक परिवर्तनास हे निर्णय खूप महत्वाचे असतील...!

आज रात्रीपासून 500 आणि 1000 रुपयांच्या नोटा बंद होणार...हॉस्पिटल पेट्रोलपंप यावर 10 तारखेपर्यंत नोटा चालणार आहेत...!

10 नोव्हेबर 2016 पासून 500 आणि 2000 च्या नवीन नोटा चलनात येणार आहेत...बँकेत आणि पोस्ट ऑफिसमध्ये जुन्या नोटा बदलून देण्याचे आदेश दिले जातील...यासाठी देखील काही महिने मुदत दिली जाईल...!

काही दिवस एका दिवसाला 2000 रुपये काढण्याची मर्यादा राहणार...त्यानंतर काही दिवसांत 4000 करण्यात येईल आणि आवश्यकता राहिल्यास परत त्यात वाढ केली जाईल...

आता समजत असलेल्या माहितीनुसार नोटा केवळ रिप्लेस कराव्या लागतील...काळे धन असणारा कोणी कॅश ठेवत नाही...जमीन आणि बांधकाम क्षेत्रात प्रचंड गुंतवणूक आहे...!

तात्पुरती मलमपट्टी असे याचं स्वरूप असेल...तरीदेखील डाव्या विचारांच्या अर्थतज्ञांचा या निर्णयावर प्रभाव असल्याचं स्पष्ट दिसत आहे... सध्या सरकारच्या विरोधात जनमत तयार होत असल्याचं लक्षात आल्यामुळे काळे धन तयार होऊ नये यासाठी आम्ही काहीतरी करून दाखवत आहे असं हे आहे...!

सरकारने निवडणुकीपूर्वी देशभर रान उठवलेल्या परदेशातील काळ्या पैशाचे काय झालं....?लोकांच्या खात्यावर 15 लाख येणार होते त्याचंही काही समजत नाही...!

सोने,रिअल इस्टेट,वैद्यकीय व्यवसाय,शिक्षण क्षेत्र यामध्ये गुंतवलेल्या पैसा कसा बाहेर काढणार...बड्या भांडवलदारांना दिलेल्या कर्जाच्या सवलतीचा हिशोब कोण देणार...?

शिवराम ठवरे-08-11-2016
मुक्त पत्रकार-9175273528
shivramthavare25gmail.com

बहुजननायक श्रीकृष्ण

असुर बहुजननायक श्रीकृष्ण

"कृष्ण"बहुजन नायक

कृष्ण-बलराम दैव वादाला विरोध करणारे असुर महामानव.....!

असुर का कारण "कंस" असुर होता याचा अर्थ त्याची बहिण देवकीचे पोटी जन्म घेणारी संतती असुरच....!

ज्यानी सर्वप्रथम सुर सम्राट इंद्राचा पराभव केला...गोवर्धन प्रसंग आठवा.

आपल्या राज्यातील गोपालक शेतकरी समाजातील लोकांचा रोजगार असणाऱ्या दुग्ध व्यवसायास चालना देऊन पहिली "धवलक्रांति" केली.

त्यालाच "दूध आणि दुग्धजन्य पदार्थ चोर" म्हणून ब्राम्हणी लेखकानी बदनाम केले.

स्त्री जातीला आत्मसन्मान मिळावा यासाठी प्रयत्न केले जनजागृती केली त्यालाच "16 हजार 108" बायका केल्या "रासलीला" करुन संभोग केला असे म्हणून बदनाम केले.

बहुजन समाजातील जे लोकप्रिय ते आपले म्हणत कृष्ण आणि बलराम याना दैवत बनवत खरा सत्य इतिहास बाजूला सारत "दशअवतार" संकल्पना  तयार करुन बहुजन समाजाला स्वतःचे पोट भरावे यासाठी मूर्ख बनवले.

निसर्गपुजेला प्रमाण मानत कृषी संस्कृतीचा गौरव केला..... नागाला मारु नका तो "शेतकरी मित्र" आहे असे त्यानेच सर्वप्रथम सांगितले....कालिया मर्दन आठवा...!

पारंपरिक खेळ,स्थानिक संस्कृती उत्सव याना प्रोत्साहन देणारा अनोखा बहुजन नायक..खो-खो,कबड्डी,लगोर,सुरपाटया,चेंडूफळी,मल्लयूद्ध इत्यादि...!

उखळ-मूसळ आणि नांगर या बहुजन समाजाचे रोजच्या जगण्यातील प्रतिके राष्ट्रचिन्ह म्हणून वापरणारा बहुजन समाजाचे प्रगतिचे "सुदर्शन चक्र"फिरवणारा महान सम्राट.

कौरव आणि पांडव यांचे राजकीय  युद्धात प्रत्यक्ष अथव अप्रत्यक्ष सहभागी  नसतानाही बहुजन समाजातील लोकप्रियता लक्षात घेऊन  "ब्राह्मणी मनूस्मृती" आणि "वर्णव्यवस्था" गिता नावाच्या ब्राह्मणी पुस्तकातुन त्याचे नावे खपवन्याचा प्रयत्न करणाऱ्या ब्रामणी वृतीचा निषेध.

आता आपण शिक्षित आहोत.... जागृत आहोत...प्रश्न उपस्थित करू...चर्चा करू ..खरे खोटे समजून घेऊ....बहुजन समाजातील महापुरुष बदनाम करण्याचे ब्राम्हणी षडयंत्र उध्वस्त करू...!

या  वर्षी "कृष्णजन्माष्टमी" च्या आनंदात सहभागी होत फक्त ही चर्चा सर्व बहुजन समाजातील शिक्षित लोकांपर्यंत पोहचवा आणि संस्कृति शुद्धी करण्याचे महान लढाईचे प्रवर्तक  होऊया....!

प्रतिगामी विचार डोक्यातुन काढून माझ्या धडावर माझ्या विचारांचे डोके बसावे म्हणून प्रत्यक्ष अप्रत्यक्ष झटनारया डॉ.आ.ह.साळुंखे,डॉ.बाबुराव गुरव,कॉ.धनाजी गुरव,राजाभाऊ शिरगुप्पे,कॉ.विजय मांडके, प्रा.गौतम काटकर आणि माझे सर्व मित्र मैत्रिणी,माझी बायाको सुनंदा  सर्व विद्रोही सहकारी यांचे विचारततून....!

शिवराम ठवरे 05-09-2015
विद्रोही सांस्कृतिक चळवळ,महाराष्ट्र.
shivramthavare25@gmail.com